Türkmenistanyň Prezidenti Serdar Berdimuhamedow Garaşsyz, hemişelik Bitarap Türkmenistanyň edermen oba zähmetkeşlerini, hasyl ussatlaryny we ähli halkyny Hasyl toýy mynasybetli tüýs ýürekden gutlady. Bu barada Türkmenistanyň Döwlet habarlar agentligi habar berdi.

Döwlet Baştutanymyz gutlagynda Hasyl toýunyň türkmen daýhanlarynyň halal zähmetiniň, sahawatly türkmen topragynyň berekediniň we ýurdumyzyň oba hojalyk pudagynda gazanylýan üstünlikleriň dabaralanmasydygyny belledi.

Döwlet Baştutanymyz oba zähmetkeşlerine berk jan saglyk, maşgala abadançylygyny, ekerançylyk meýdanlaryny ösdürmekde, bol hasyl almakda hem-de milli ykdysadyýetiň oba hojalyk pudagynyň ösüşine goşant goşmakda uly üstünlikleri arzuw etdi.

Gutlagda Garaşsyz, hemişelik Bitarap Türkmenistanda giňden bellenilýän Hasyl toýunyň halkymyzyň ene topraga bolan söýgüsiniň, zähmetsöýerliginiň we ata-babalardan gelýän daýhançylyk däplerine ygrarlylygynyň nyşanydygy nygtaldy. Bu baýramçylygyň türkmen daýhanlarynyň ýylyň dowamynda çeken halal zähmetine goýulýan belent sarpanyň beýanydygy bellenildi.

Arkadagly Gahryman Serdarymyz häzirki döwürde oba hojalyk pudagyny toplumlaýyn ösdürmek, onuň maddy-enjamlaýyn binýadyny pugtalandyrmak, önümçilige öňdebaryjy tehnologiýalary ornaşdyrmak, tohumçylyk işini kämilleşdirmek hem-de ýer we suw serişdelerinden netijeli peýdalanmak boýunça giň gerimli işleriň alnyp barylýandygyny aýtdy.

Gutlagda şu ýyl gallaçy daýhanlaryň Watan harmanyna 1 million 400 müň tonnadan gowrak bugdaý tabşyrandygy bellenilip, bu ýokary görkezijiniň halkymyzyň rysgal-berekediniň, azyk howpsuzlygynyň we oba zähmetkeşleriniň yhlasly zähmetiniň netijesidigi nygtaldy.

Türkmenistanyň hormatly Prezidenti Serdar Berdimuhamedow oba hojalyk pudagynda işleýän kärendeçileriň, pagtaçylaryň, gallaçylaryň, mehanizatorlaryň, alym-agronomlaryň, seçgiçileriň, bagbanlaryň we beýleki hünärmenleriň döredýän goşandyna ýokary baha berdi. Olaryň öndürijilikli zähmet çekmegi, täze üstünlikleri gazanmagy üçin döwletiň ähli zerur şertleri döredýändigini belledi.

Şeýle hem oba hojalyk önüm öndürijilerini häzirki zaman tehnikalary, enjamlary, ýokary hilli tohumlar we mineral dökünler bilen üpjün etmek boýunça işleriň dowam etdiriljekdigi, öndürilen hasyl üçin hasaplaşyklaryň öz wagtynda geçiriljekdigi bellenildi.

Türkmenistanyň Prezidenti Serdar Berdimuhamedow gutlagynyň ahyrynda oba zähmetkeşlerini Hasyl toýy bilen ýene-de bir gezek gutlap, olara berk jan saglygyny, maşgala abadançylygyny we eziz Watanyň mundan beýläk-de gülläp ösmegi ugrunda alyp barýan işlerinde uly üstünlikleri arzuw etdi.