18-nji dekabrda Türkmenistanyň Daşary işler ministriniň orunbasary Mähri Bäşimowanyň ýolbaşçylygyndaky Türkmenistanyň wekiliýeti Marokko Patyşalygynyň Rabat şäherinde Bütindünýä yslam ýurtlarynyň bilim, ylym we medeniýet meseleleri boýunça guramasynyň (ICESCO) ştab-kwartirasynda beýik türkmen şahyry Magtymguly Pyragynyň doglan gününiň 300 ýyllygyny bellemek boýunça çärelere gatnaşdy.

Çäreler Türkmenistanyň Hökümeti tarapyndan ICESCO-nyň Baş direktoraty we Türki medeniýetiň halkara guramasynyň Baş Sekretariaty (TÜRKSOÝ) bilen bilelikde guraldy.

Günüň birinji ýarymynda M.Bäşimowanyň ICESCO-nyň Baş direktory doktor Salem Bin Mohammed Al Malik bilen duşuşygy boldy. Taraplar hyzmatdaşlygy ösdürmegiň mümkinçiliklerini ara alyp maslahatlaşdylar we ýurtlaryň we halklaryň arasynda dostlukly gatnaşyklary ösdürmekde medeni diplomatiýanyň ähmiýetini nygtadylar.

Soňra beýik akyldar şahyr Magtymguly Pyragynyň doglan gününiň 300 ýyllygy mynasybetli guralan dabaraly çäreler başlandy. Ilki bilen, dabara gatnaşyjylara türkmen halkynyň amaly-haşam sungatynyň eserleriniň sergisi bilen tanyşmaga mümkinçilik döredildi.

Soňra türkmen we daşary ýurtly alymlaryň gatnaşmagynda «Magtymguly Pyragynyň ömrüni we döredijiligini hemmetaraplaýyn öwrenmek üçin bilelikdäki tagallalar» atly ylmy-amaly maslahatyň açylyşy boldy.

Maslahaty açmak bilen, ICESCO-nyň Baş direktory doktor Salem Bin Mohammed Al Malik Magtymguly Pyragynyň döredijiliginiň ynsanperwer mazmunynyň tutuş adamzat üçin, esasan hem Yslam dünýäsi üçin aýratyn ähmiýetini nygtady. ICESCO-nyň Baş direktorynyň belleýşi ýaly, Magtymguly Pyragy ýurtlary we halklary birleşdirýän özboluşly köprini döretdi. Türkmenistanyň Hökümetine we TÜRKSOÝ-yň ýolbaşçylaryna ICESCO-nyň meýdançasynda şeýle möhüm çäräni geçirmek başlangyjy üçin minnetdarlyk bildirip, doktor Al Malik hyzmatdaşlygy mundan beýläk-de ösdürmäge taýýardygyny tassyklady.

Soňra TÜRKSOÝ-yň Baş sekretary Soltan Raýew çykyş etdi. Marokko Patyşalygynda Magtymguly Pyragynyň 300 ýyllygyny bellemek başlangyjyny goldandyklary üçin Türkmenistanyň ýolbaşçylygyna, şeýle hem ICESCO-a minnetdarlygyny bildirdi.

Jenap Raýew bu wakalaryň umumy gymmatlyklar arkaly halklaryň ýakynlaşmagyna itergi berýändigini nygtady. Şeýle hem Türkmenistanyň Hökümetiniň goldawy esasynda TÜRKSOÝ-yň türkmen halkynyň milli özboluşlylygyny ýaýratmagy maksat edinýän köptaraplaýyn taslamalary durmuşa geçirýändigini we geçirmegi dowam etdirjekdigini belledi.

Türkmenistanyň Daşary işler ministriniň orunbasary Mähri Bäşimowa öz çykyşynda ICESCO-nyň we TÜRKSOÝ-yň ýolbaşçylaryna bu çäräni ýokary derejede gurandygy üçin minnetdarlyk bildirdi we Magtymguly Pyragynyň bütin dünýäde hormatlanmagynyň tutuş adamzat üçin onuň ähmiýetini ýene bir gezek tassyklaýandygyny nygtady.

Maslahatda ÝUNESKO-nyň işleri barada Türkmenistanyň milli toparynyň jogapkär sekretary Çynar Rüstemowa, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alym kätibi Kakajan Janbekow, dosent, Ankara uniwersitetiniň türki dilleriň häzirki zaman dialektleri fakultetiniň doktory Seljan Saglyk Şahin we ICESCO-nyň özara gatnaşyklar we hyzmatdaşlyk departamentiniň ýolbaşçysy Anar Karimow çykyş etdiler.

Çykyşlarda Magtymguly Pyragynyň mirasyny hem-de ylym-bilim we medeni ugurlarda ikinji orunda durýan ICESCO-nyň platformasyndaky işini wagyz etmekde bu çäräniň ähmiýeti bellenildi. Mysal hökmünde Gadymy Köneürgenç şäherine baryp, türkmen halkynyň baý medeniýeti bilen tanyşan Marokkoly alym Abu Abdullah Muhammet ibn Battutanyň eserleri bellenildi.

300 ýyldan bäri adamçylyga, ynsanperwerlige we parahatçylyksöýüjilige çagyrýan gollanma bolup hyzmat eden Magtymguly Pyragynyň eserleriniň terbiýeçilik we bilim nukdaýnazaryndan ähmiýeti aýratyn nygtaldy.

Maslahat tamamlanandan soň türki dünýäsiniň medeniýet we sungat ussatlarynyň gala konserti geçirildi.

Çeşme: Türkmenistanyň Daşary işler ministrligi