Arkadag şäheriniň jemgyýetçilik guramalarynyň binasynda Türkmenistanyň Magtymguly adyndaky Ýaşlar guramasynyň şäher Geňeşi tarapyndan guralan «Tegelek stol» geçirildi.

Çärä gatnaşanlar ýurdumyzyň tamamlanyp barýan şu ýylda gazanan üstünlikleri we iň ösen tehnologiýalary birleşdirýän häzirki zaman şäher meýilnamasynyň mysaly hökmünde halkara derejesinde giňden ykrar edilen Arkadag şäheriniň üstünlikli ösüşini ara alyp maslahatlaşdylar.

Çärede çykyş edenler şu ýyl «akylly» şäher düşünjesi esasynda döredilen Arkadag şäheriniň Koreýa Respublikasynda geçirilen «World Smart City Expo» Bütindünýä sergisinde üç baýraga mynasyp bolandygyny, özi-de diňe şu şäheriň görnükli üstünlikleri üçin «akylly» şäher ulgamynda baýraga mynasyp bolandygyny ýatladylar. Innowasion şäher meýilnamalaşdyrylyşyna we ajaýyp hil ülňülerine ygrarlylygy üçin Arkadag şäheri Wenada ýerleşýän Ýewropa Hil barlagy jemgyýetiniň abraýly (ESQR’s Quality Choice Prize 2024) «Almaz kategoriýasy» (Diamond category) baýragyna mynasyp boldy. Şäher ösüşi, saglygy goraýyş we energiýa netijeliligi ýaly ugurlarda hil dolandyryşynda görnükli derejäni belleýän bu baýrak şäherde öňdebaryjy tehnologiýalary ekologiýa taýdan arassa tejribe bilen durnukly şäherleşme modelini döretmekde üstünlikli utgaşdyrýandygyny nygtaýar.

Arkadag şäheriniň lukmançylyk toparynyň önümleriniň halkara derejesinde hasaba alynmagy we ýörite şahadatnama bilen tassyklanan Bütindünýä intellektual eýeçilik guramasynyň halkara býurosy tarapyndan önümleriniň söwda bellikleriniň ykrar edilmegi-de geçen ýylda gazanylan üstünlikleriň biri boldy. Bu lukmançylyk topary derman döretmegi, lukmançylyk tehnologiýalaryny we önümlerini ösdürmek, şeýle hem raýatlaryň saglygyny goramakda iň oňat dünýä tejribesini ulanmak bilen, bu ugurda döwrebap bilim bermäge gönükdirilen giňişleýin innowasiýa tehnologiýasyna esaslanýar.

Ýakynda geçirilen «Akylly şäher: dolandyryş tehnologiýalary, sanly, akylly we EA tehnologiýalary, howpsuzlyk, ykdysadyýet» atly halkara ylmy we amaly konferensiýada Arkadag şäherine Koreýa Respublikasynyň, Hindistanyň, Türkiýäniň, Rumyniýanyň, Russiýanyň we Özbegistanyň şereketleridir ylmy agtaryş merkezleri tarapyndan infrastrukturany, akylly ulag ulgamlaryny ösdürmek, energiýa netijeliligini artdyrmak, gözegçilik we daşky gurşawy dolandyrmakda gazanylan üstünlikler üçin şahadatnamalar berildi.

«Tegelek stoluň» dowamynda Arkadag şäheriniň taslamasynyň uzak gelejek göz öňünde tutulmak bilen taýýarlanýandygy we türkmen halkynyň buýsanjydygy nygtaldy.

Çeşme: «Türkmenistan: Altyn asyr»