Türkmenistan uly göwrümli uglewodorod serişdelerine eýe bolup, nebit-gaz pudagyny işjeň ösdürýär. Ýurdumyz dünýäniň öňdebaryjy nebit-gaz kompaniýalary we maliýe institutlary bilen hyzmatdaşlygy çuňlaşdyrmagy hem-de energetika ulgamynda täze mümkinçilikleri açmagy maksat edinýär.

Milli ýangyç-energetika toplumyna iň täze ylmy-tehniki işläp taýýarlamalary, innowasion tehnologiýalary we sanly ulgamlary ornaşdyrmaga aýratyn üns berilýär. Bu bolsa önümçiligiň ösmegine, netijeliligiň ýokarlanmagyna we eksport mümkinçilikleriniň giňelmegine itergi berýär.

Türkmenistanyň elektroenergetika pudagy işjeň ösýär: önümçilik kuwwatlyklary artdyryldy we iň täze tehnologiýalar bilen enjamlaşdyrylan tebigy gazda işleýän döwrebap elektrik stansiýalary ulanyşa girizildi. Senagat önümçiliginiň köpüsini öz içine alýan gaz pudagy hem gözleg-geçirijilik işlerinden başlap, taýýar önümleri sarp edijilere ýetirýänçä ähli tapgyrlarda öňdebaryjy tehnologiýalary ornaşdyrýar.

Nebit senagatynda bolsa täze ýataklary özleşdirmäge we önümçilik kuwwatlyklaryny döwrebaplaşdyrmaga aýratyn üns berilýär, bu bolsa nebitiň çykarylyş möçberini artdyrmaga ýardam berýär. Häzirki zaman tehnologiýalarynyň ulanylmagy diňe bir ýangyç öndürmäge däl, eýsem, mata, plastik önümleri, boýaglar, ýaglaýjy ýaglar, bioýangyç, şeýle hem wodorod ýangyjy we suwuklandyrylan gaz ýaly dürli görnüşli önümleri öndürmäge mümkinçilik berýär.

Türkmenistanda tebigy serişdeleri özleşdirmegiň möhüm taraplarynyň biri olary rejeli peýdalanmak we daşky gurşawy goramak boýunça talaplaryň doly berjaý edilmegidir. Türkmenistan ähli senagat desgalarynda ekologiýa taýdan howpsuz tehnologiýalary ornaşdyrýar we energetiki howpsuzlyk boýunça halkara başlangyçlary goldaýar.

Türkmenistan innowasion çemeleşmeleri ornaşdyryp, ekologiýa kadalaryny berjaý edip, dünýä energetika bazaryndaky ornuny yzygiderli pugtalandyrýar. Bu bolsa ýurduň ählumumy energetika ulgamynda möhüm ähmiýete eýe bolup galmagyna şert döredýär.