Hormatly Prezidentimiz Serdar Berdimuhamedowyň baştutanlygynda ýurdumyzda ylym-bilim ulgamyny döwrebaplaşdyrmak boýunça giň gerimli işler durmuşa geçirilýär. Munuň aýdyň subutnamasy hökmünde Ýagşygeldi Kakaýew adyndaky Halkara nebit we gaz uniwersitetiniň binýadynda açylan Hytaý Halk Respublikasynyň innowasion taslamasy bolan «Lu Ban ussahanasyny» görkezmek bolar. Bu merkeziň düzümindäki «Maglumat ulgamlary we tehnologiýalary» tejribehanasy talyplara diňe bir nazary bilim däl, eýsem, önümçilige gönükdirilen inženerçilik başarnyklaryny öwretmäge giň mümkinçilikleri açdy.
Tejribehanada sapak okatmagyň usulyýetiniň esasyny önümçilik we tehnologiýanyň utgaşmasy emele getirýär. Okuw prosesinde hytaý innowasion pedagogikasynda meşhur bolan EPIP (Engineering Profession Innovation Project — Inženerçilik hünär innowasion taslamasy) modeli işjeň ulanylýar. Bu usul mugallymdan adaty leksiýa çäklerinden çykyp, talyplary real inženerçilik meselelerini çözmäge gönükdirmegi talap edýär.
Maglumat tehnologiýalary tejribehanasynda geçirilýän sapaklaryň tapawutly aýratynlyklary, ilkinji nobatda, önümçilik enjamlary bilen simulýatorlaryň özara utgaşmasynda ýüze çykýar. Talyplar programmirleme, nebit-gaz pudagynda maglumat ulgamlaryny dolandyrmak we kiberhowpsuzlyk esaslaryny halkara kompaniýalaryň ulanýan real platformalarynda hem-de ýöriteleşdirilen programmalaýyn üpjünçiliklerinde tejribe edýärler. Bu bolsa bilim alýanlaryň geljekki iş ýerlerine öňünden uýgunlaşmagyna şert döredýär.
Şeýle hem sapaklar taslama esasly okatmak (Project-Based Learning) usulyýetine görä guralýar. Okuw prosesi adaty laboratoriýa işlerini mehaniki ýerine ýetirmek çäklerinden çykyp, kiçi göwrümli inženerçilik ýa-da IT taslamalaryny döretmek formatynda alnyp barylýar. Şeýle çemeleşme talyplaryň logiki pikirlenmesini ösdürmek bilen birlikde, toparlaýyn işlemegi we kynçylyklara innowasion çözgüt tapmagy öwredýär.
Şunuň bilen birlikde, tejribehanada integrirlenen bilim gurşawy üpjün edilýär. Maglumat tehnologiýalary dersi beýleki ugurlardan üzňe däl-de, nebit-gaz geologiýasy, buraw işleri we önümçiligi awtomatlaşdyrmak ýaly pudaklaýyn ylymlar bilen berk baglanyşykda okadylýar.
Çeşme: «Nebit-gaz» gazeti
