Türkmenistanyň Prezidenti Serdar Berdimuhamedow 22-nji maýda sanly ulgam arkaly Hökümetiň nobatdaky mejlisini geçirdi. Onda döwlet durmuşyna degişli birnäçe meselelere garaldy.
Hökümet mejlisinde ilki wise-premýer Hojamyrat Geldimyradow Türkmenistanyň 2027-nji ýyl üçin Döwlet býujetini işläp düzmek boýunça alnyp barylýan işler barada hasabat berdi. Ol döwlet Baştutanymyzyň garamagyna degişli resminamanyň taslamasyny hödürledi.
Hormatly Prezidentimiz hasabaty diňläp, ýurdumyzy durmuş-ykdysady taýdan ösdürmek boýunça netijeli işleriň amala aşyrylýandygyny aýtdy. Döwlet Baştutanymyz bu işleri geljek ýylda hem dowam etdirmek maksady bilen, Türkmenistanyň 2027-nji ýyl üçin Döwlet býujetini düzmek hakynda Karara gol çekdi we wise-premýere degişli işleri geçirmegi tabşyrdy.
Soňra beýleki wise-premýerler öz gözegçilik edýän ulgamlarynda alnyp barylýan işler, ozal berlen tabşyryklaryň ýerine ýetirilişi, öňde boljak çärelere görülýän taýýarlyk işleri barada hasabatlary berdiler.
Döwlet Baştutanymyz hasabatlary diňläp, garamagyna hödürlenilen teklipleri makullady we degişli ýolbaşçylara anyk tabşyryklary berdi.
Ministrler Kabinetiniň mejlisinde 20-nji maýda BMG-niň Baş Assambleýasynyň 80-nji sessiýasynyň 82-nji plenar mejlisinde Türkmenistanyň başlangyjy bilen hödürlenen «Halkara parahatçylygy, howpsuzlygy we durnukly ösüş işini goldamakda hem-de berkitmekde bitaraplyk syýasatynyň orny we ähmiýeti» atly täze Kararnamanyň biragyzdan kabul edilendigi baradaky hoş habar hem aýdyldy.
Türkmenistanyň Prezidenti Hökümet mejlisiniň barşynda 27-28-29-njy maýda Gurban baýramyny bellemek hakynda Permana gol çekdi. “Gurbanlyk günlerinde beriljek sadakalar kabul bolsun!” diýip, hormatly Prezidentimiz aýtdy we mejlise gatnaşyjylary, halkymyzy 25-nji maýda belleniljek Aşgabat şäheriniň güni, «Soňky jaň» dabarasy, şeýle-de onuň yzysüre gelýän Gurban baýramy bilen gutlady.
Mejlise gatnaşyjylar hem döwlet Baştutanymyza we Gahryman Arkadagymyza bu baýramçylyklar mynasybetli gutlaglaryny beýan etdiler.
Hökümet mejlisinde döwlet durmuşyna degişli başga-da birnäçe möhüm meselelere seredildi we olar boýunça degişli çözgütler kabul edildi.
Çeşme: Türkmenistanyň Döwlet habarlar agentligi
