Türkmenistanyň Prezidenti, Ýaragly Güýçleriň Belent Serkerdebaşysy Serdar Berdimuhamedow Döwlet howpsuzlyk geňeşiniň nobatdaky mejlisini geçirdi. Çärede harby we hukuk goraýjy edaralaryň şu ýylyň ilkinji bäş aýynda bitiren işleriniň netijeleri jemlenip, ýurtda durnuklylygy goramak hem-de düzümleri döwrebaplaşdyrmak meseleleri giňişleýin ara alnyp maslahatlaşyldy.

Mejlisde goranmak, içeri işler, milli howpsuzlyk, adalat ministrleri, şeýle-de baş prokuror, Ýokary kazyýetiň, serhet, gümrük we migrasiýa gulluklarynyň ýolbaşçylary hasabat berdiler. Hasabatlarda goşun bölümleriniň kuwwatyny artdyrmak, hukuk düzgün-tertibini berkitmek, serhetleri ygtybarly goramak, şeýle hem edaralaryň işine sanly ulgamy we innowasion tehnologiýalary ornaşdyrmak ugrunda amala aşyrylan çäreler bellenildi. Harby gullukçylaryň gulluk hem-de ýaşaýyş-durmuş şertlerini gowulandyrmak işlerine aýratyn üns çekildi. Duşuşygyň dowamynda Prezident kazylary wezipä bellemek we boşatmak baradaky degişli Permana gol çekdi.

Mejlisiň ahyrynda döwlet Baştutanymyz goranyş häsiýetli Harby doktrina laýyklykda, Türkmenistanyň howpsuzlygyny we çäk bitewüligini üpjün etmek, Watan goragçylaryny goldamak boýunça işleriň yzygiderli dowam etdiriljekdigini nygtady. Geňeşde harby düzümleriň işini kämilleşdirmäge gönükdirilen başga-da birnäçe möhüm çözgütler kabul edildi.

Çeşme: «Türkmenistan: Altyn asyr» elektron gazeti