Türkmenistanyň Prezidenti Serdar Berdimuhamedow Portugaliýa Respublikasynyň Prezidenti Antoniu Žoze Seguruwa ýurduň milli baýramy — Portugaliýanyň güni mynasybetli tüýs ýürekden gutlaglaryny we iň gowy arzuwlaryny iberdi. Bu barada «Türkmenistan: Altyn asyr» elektron gazeti habar berdi.

Döwlet Baştutanymyz şu ýakymly mümkinçilikden peýdalanyp, Prezident Antoniu Žoze Seguruwa berk jan saglyk, egsilmez bagtyýarlyk hem-de abadançylyk, doganlyk Portugaliýanyň halkyna bolsa parahatçylyk, yzygiderli ösüş we mundan beýläkde rowaçlyk arzuw etdi.

Ýatladyp geçsek, Türkmenistan bilen Portugaliýanyň arasyndaky diplomatik gatnaşyklar 1992-nji ýylyň 14-nji awgustynda ýola goýuldy. Iki döwlet hem abraýly halkara guramalarynyň, aýratyn-da BMG-niň çäklerinde biri-biriniň öňe sürýän halkara başlangyçlaryny yzygiderli goldap gelýärler. Häzirki wagtda taraplar söwda-ykdysady, energetika we medeni-ynsanperwer ugurlardaky özara bähbitli hyzmatdaşlygy has-da giňeltmäge uly ymtylyş görkezýärler. Taraplar maýa goýumlaryny çekmek, suw serişdelerini netijeli dolandyrmak we sanly tehnologiýalary ornaşdyrmak ýaly geljegi uly pudaklarda hyzmatdaşlygy işjeňleşdirmegi meýilleşdirýärler. Şeýle hem iki döwlet medeniýet, bilim we syýahatçylyk ulgamlarynda gatnaşyklary pugtalandyrmak ugrunda yzygiderli çäreleri durmuşa geçirýärler.