«Türkmengaz» döwlet konserniniň işgärler bölümi tarapyndan Ylmy-barlag tebigy gaz institutynda usuly okuw maslahat geçirildi. Seminara degişli konserniň düzümindäki edara-kärhanalaryň işgärler bölüminiň başlyklary, jogapkär işgärleri, hünärmenleri gatnaşdylar. Işgärler bölüminiň işini kämilleşdirmek, işleriň ýöredilişinde sanly ulgamy netijeli peýdalanmak, işgärleriň hukuklaryny goramaga gönükdirilen çäreler, resminamalary talabalaýyk ýöretmek, ýokary hem-de orta hünär okuw mekdeplerini tamamlan ýaş hünärmenleri işe ugrukdyrmak, olaryň hünärini düýpli öwrenmegini gazanmak, tejribesini artdyrmak, bu babatda ýurdumyzda ir döwürlerden dowam edip gelýän halypa-şägirtlik ýolundan doly peýdalanmak maksady bilen geçirildi.
Usuly okuw maslahatdaky çykyşlarda bellenilişi ýaly, ýurdumyzda adam baradaky alada döwlet syýasatynda ileri tutulýar. Garaşsyz, hemişelik Bitarap Türkmenistanda halkymyzyň abadan durmuşyny üpjün etmeklige gönükdirilen döwlet we milli maksatnamalar yzygiderli durmuşa geçirilýär.
Nebitgaz toplumynyň düzümlerinde, şol sanda «Türkmengaz» döwlet konserniniň garamagyndaky edaralarda, önümçilik we hyzmatlary alyp baryjy kärhanalarda hem işler döwrüň ruhuna laýyk ýola goýlandyr. Işgärleriň amatly şertlerde zähmet çekmegi, hünärini kämilleşdirmegi, zähmet howpsuzlygynyň üpjün edilmegi, sagdyn iş gurşawynyň kemala gelmegi üçin ähli amatly şertler döredilendir.
Ylmyň we tehnikanyň häzirki ösen döwründe ýaş işgärleriň, hünärmenleriň mümkinçiliklerinden doly peýdalanylmagy, giň düşünjeli, hünärini çuň ele alan, halkara tejribeleri özleşdiren işgärleriň wezipe borçlaryny pugta berjaý etmegi, iş ýerinde ýokary derejede zähmet çekmeginiň gazanylmagy milli ykdysadyýetimizi pugtalandyrmakda möhüm ähmiýete eýedir. Türkmenistanyň hormatly Prezidenti Serdar Berdimuhamedow ýaşlary jemgyýetiň iň kuwwatly we işjeň bölegi, Watanymyzyň hem-de ösüşleriň daýanjy hasaplaýar, ýaşlaryň zähmetini beýik maksatlara ýetmegiň we ýurdumyzy ösdürmegiň esasy şerti, şeýle-de ynsanyň abraýyny hem-de gadyr-gymmatyny kesgitleýän iň ýokary gymmatlyk hökmünde belentden bahalandyrýar. Arkadagly Gahryman Serdarymyz: «Biz Berkarar döwletiň täze eýýamynyň Galkynyşy döwründe öňümizde belent maksatlary goýduk. Mähriban Watanymyzyň abadançylygyny we durmuş-ykdysady ösüşini, halkymyzyň ýaşaýyş derejesini mundan beýläk-de ýokarlandyrmak, dünýäde parahatçylygy hem-de ynanyşmagy berkitmek wezipelerini öňe sürdük. Şu belent maksatlara ýetmekde ýurdumyzyň ýaş nesillerine aýratyn bil baglaýarys» diýip belleýär. Görşümiz ýaly, hormatly Prezidentimiz ýaş nesle zähmet terbiýesini bermegiň wajyplygyny nygtap, her bir ýaş ynsanyň zähmeti özüne baýdak edinmelidigini we ata Watanymyzyň gülläp ösmegi ugrunda jan aýaman zähmet çekjekdigine berk ynanýandygyny aýdýar.
Şeýle-de usuly okuw maslahatda işgärler bölümi tarapyndan hormatly Prezidentimiziň parasatly sözlerinden, ýaşlara bolan ynamyndan ugur alyp, ýaş hünärmenleriň işe ugrukdyrylmagyna, olaryň üstünlikli zähmet çekmegine, ýaş alymlaryň ylmy seljermelerine, tekliplerine, halypalar, alymlar bilen netijeli işleşmegine hemişe üns berilmelidigi, zehinli, ukyply, işbaşarjaň ýaşlary ýüze çykarmakda, ýolbaşçy düzümine girýän ätiýaç işgärleriň goruny, sanawyny taýýarlamakda wezipe borçlaryny pugta berjaý etmelidigi beýan edildi.
Usuly okuw maslahatyň ahyrynda «Türkmengaz» döwlet konserni tarapyndan Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň tagallalary netijesinde ýurdumyzyň nebitgaz senagatynda durmuşa geçirilýän özgertmelere mynasyp goşant goşup, arassa, halal işi, göreldeli işgär hökmünde ýadawsyz çekýän zähmeti, hünär ussatlygy bilen tapawutlanýan, ýaş hünärmenleriň kämilleşmegine ýardam berýän halypa işgärler Hormat haty bilen sylaglanyldy.
Çeşme: «Nebit-gaz» gazeti
