Türkmenistanyň Döwlet haryt-çig mal biržasynyň 17-nji iýunda geçirilen nobatdaky söwdalarynda daşarky we içerki bazarlarda uly möçberli şertnamalar baglaşyldy. Söwda gününiň netijeleri boýunça jemi 13 sany geleşik hasaba alnyp, olaryň umumy bahasy 43 million 898 müň 518,80 ABŞ dollaryna we 7 million 128 müň manada deň boldy. Bu barada Türkmenistanyň Döwlet haryt-çig mal biržasynyň metbugat gullugy habar berdi.

Halkara hyzmatdaşlygynyň çäklerinde Owganystanyň hem-de Birleşen Arap Emirlikleriniň işewür toparlary «Türkmennebit» döwlet konserniniň edaralarynda öndürilen gidrousulda arassalanan dizel ýangyjyny uly möçberde satyn aldylar. Şeýle hem daşary ýurtly hyzmatdaşlaryň türkmen önümlerine bolan gyzyklanmasy netijesinde, Türkiýe Respublikasynyň wekilleri ýerli telekeçilerden nah ýüplügini, pagta süýümini hem-de dürli görnüşli dokma önümlerini satyn almak barada özara bähbitli ylalaşyklara gol çekdiler.

Şol bir wagtda içerki bazarda hem işjeňlik dowam etdi. Ýerli telekeçiler özara söwdalaryň barşynda Türkmenistanyň Dokma senagaty ministrliginiň kärhanalaryndan ýokary hilli nah ýüplügini satyn almak boýunça şertnamalary baglaşdylar. Satyn alynan önümler ýurduň senagat kuwwatyny has-da berkitmäge gönükdiriler.