Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow gadymy Änew topragynda ýerleşýän Seýit Jemaleddin metjidinde öten-geçenleri hatyralap, sadaka berdi. Bu asylly çäre halkymyzyň asyrlar boýuň gelýän milli we dini däp-dessurlaryna ygrarlydygynyň nobatdaky güwäsine öwrüldi. Saglyk, abadançylyk hem-de ýurdumyzyň durmuşynda gazanylýan üstünlikleriň dowamly bolmagy dileg edilip berlen sadaka giň jemgyýetçiligi bir ýere jemledi. Bu barada «Türkmenistan bu gün» döwlet habarlar agentligi habar berdi.
Sadakanyň öňüsyrasynda hajy Arkadagymyz Ahal welaýatynyň Ak bugdaý etrabynyň Magtymguly obasynda ýerleşýän Gurban ogly Welmyrat gonamçylygynda geçirilen arassalyk ýowaryna gatnaşyp, sogap iş bitirendigini belledi. Ýygnananlaryň öňünde çykyş eden Milli Liderimiz türkmençilik ýörelgeleriniň we mukaddesliklere goýulýan sarpanyň ähmiýetine ünsi çekip, merhumlaryň ruhunyň şat, ýatan ýerleriniň bolsa ýagty bolmagyny diledi. Şeýle hem çykyşda döwlet Baştutanymyzyň «Änew — müňýyllyklardan gözbaş alýan medeniýet» atly kitabynda beýan edilýän taryhy gymmatlyklaryň ähmiýeti ýatlandy.
Milli tagamlar çekilen sadaka naharyndan soňra, Türkmenistanyň müftüsi tarapyndan aýat-töwir okalyp, doga-dilegler edildi. Halk Maslahatynyň Başlygy berlen sadakalaryň we okalan aýat-töwirleriň Beýik Biribaryň dergähinde kabul bolmagyny arzuw edip, ýurduň parahatçylygy, il-günüň abadançylygy baradaky ýagşy umyt-arzuwlaryny beýan etdi. Şundan soňra, Milli Liderimiz Aşyr aýynyň ilkinji günlerinde asmandaky dogan täze Aýy ýüzüne sylyp, Watanymyzyň geljegi üçin ýagşy dilegleri etdi.
Çäranyň ahyrynda Gahryman Arkadagymyz metjidiň içinde jemagat bilen bilelikde agşam namazyny okady. Okalan üç rekagat parz we iki rekagat sünnet namazlaryndan soňra, ýurduň mundan beýläk-de gülläp ösmegi ile döwlet ýolbaşçylarynyň tutumly işleriniň rowaçlanmagy diledi. Ýeri gelende ýatlassak, bu ajaýyp metjit 2024-nji ýylyň martynda türkmen halkynyň Milli Lideriniň gatnaşmagynda açylyp, halkymyzyň ruhy we medeni durmuşynda wajyp orun eýelemegini dowam etdirýär.
