Türkmenistanyň Döwlet haryt-çig mal biržasynda yzygiderli geçirilýän söwdalaryň netijesinde täze sepgitlere ýetildi. Hasabat döwründe, ýagny 22-26-njy iýun aralygynda geçirilen birža söwdalarynda baglaşylan geleşikleriň umumy bahasy daşary ýurt pulunda ABŞ-nyň 58 million 571 müň dollaryndan gowrak, milli manatda bolsa 885 müň manada deň boldy. Bu döwürde dürli görnüşli eksporta niýetlenen we içerki harytlar boýunça jemi 26 sany şertnama baglaşylyp, olar resmi taýdan hasaba alyndy.

Söwda hasabatyna görä, daşary ýurtly hyzmatdaşlar tarapyndan ýurdumyzyň önümlerine uly isleg bildirildi. Türkiýe Respublikasynyň, Birleşen Arap Emirlikleriniň, Owganystanyň, Täjigistanyň, Ukrainanyň we Özbegistanyň telekeçileri daşary ýurt puluna «Türkmennebit» döwlet konserniniň desgalarynda öndürilen suwuklandyrylan gazy hem-de «Türkmenhimiýa» döwlet konserniniň kärhanasy tarapyndan taýýarlanylan ýokary hilli ECO-93 kysymly awtobenzini satyn aldylar.

Mundan başga-da, Türkiýe Respublikasynyň, Birleşen Arap Emirlikleriniň we Şweýsariýanyň işewür wekilleri halkara bazarynda uly meşhurlyk gazanan Türkmenistanyň dokma hem-de oba hojalyk önümlerini satyn almagy dowam etdirdiler. Resminamalara laýyklykda, daşary ýurt puluna nah ýüplük, arassa pagta süýümi we ýokary hilli pagta ýagy ýerlenildi.

Şonuň bilen birlikde, ýurdumyzyň içerki telekeçileri hem özara bähbitli şertnamalary baglaşdylar. Ýerli işewürler içerki bazaryň isleglerini kanagatlandyrmak hem-de önümçiligi giňeltmek maksady bilen, ýokary hilli nah matany satyn aldylar.