Türkmenistanyň Döwlet haryt-çig mal biržasynda 2-nji iýulda geçirilen söwdalarda umumy bahasy 55 317 345,00 manada we 4 505 614,57 ABŞ dollaryna deň bolan 19 sany geleşik hasaba alyndy. Bu gezekki söwda tapgyrynda daşary ýurtly we ýerli telekeçileriň gatnaşmagynda dürli önümleri satyn almak boýunça amallaryň ugurlary giňeldildi. Söwdalaşyklaryň netijesinde, daşarky we içerki bazarlarda uly isleg bildirilýän harytlaryň eksporty hem-de içerki dolanyşygy boýunça şertnamalar yglan edildi.

Daşary ýurtly hyzmatdaşlar tarapyndan türkmen önümlerine bolan gyzyklanma ýokary derejä galdy. Hususan-da, Owganystanyň we Özbegistanyň işewür toparlary “Türkmennebit” döwlet konserni tarapyndan öndürilen suwuklandyrylan gazy satyn aldylar. Türkiýe Respublikasynyň wekilleri bolsa ýerli öndürijilerden nah ýüplügini we birinji hilli arassalanan pagta ýagyny satyn almagy makul bildiler. Şeýle hem Birleşen Arap Emirlikleriniň telekeçileri tarapyndan ýokary hilli kreton nah matasyny satyn almak boýunça geleşikler resmi taýdan baglaşyldy.

Şol bir wagtda içerki bazarda hem uly işjeňlik görkezildi. Ýurdumyzyň hususy pudagynyň wekilleri “Türkmennebit” döwlet konserninden eksport ugurly we uly isleg bildirilýän “TPP D 30 S” kysymly polipropileni satyn aldylar. Mundan başga-da, Dokma senagaty ministrliginiň kärhanalaryndan dürli görnüşli kreton matalaryny we beýleki taýýar dokma önümlerini satyn almak baradaky şertnamalar resmileşdirildi.