Türkmenistanyň Döwlet haryt-çig mal biržasynda 7-nji iýulda geçirilen nobatdaky birža söwdalarynda jemi 63 430 000,00 manada we 1 721 211,17 ABŞ dollaryna deň bolan 6 sany iri geleşik baglaşyldy. Geçirilen söwda tapgyrynda daşarky we içerki bazarlaryň wekilleri uly işjeňlik görkezip, ýurdumyzda öndürilýän önümlere bolan ýokary islegi ýene-de bir gezek tassykladylar. Baglaşylan şertnamalar esasynda eksport amallary hem-de ýerli bazaryň isleglerini kanagatlandyrmaga gönükdirilen netijeli geleşikler amala aşyryldy.

Daşary ýurt işewürleri tarapyndan türkmen önümlerini satyn almak boýunça möhüm şertnamalar resmileşdirildi. Hususan-da, Birleşen Arap Emirlikleriniň telekeçileri ýerli öndürijilerden birinji hilli arassalanan (rafinirlenen) pagta ýagyny satyn aldylar. Şonuň bilen birlikde, Türkiýe Respublikasynyň işewürlik wekilleri hem türkmen dokma önümlerine we nah matalaryna uly gyzyklanma bildirip, degişli geleşikleri baglaşdylar. Bu bolsa ýurdumyzyň dokma we gaýtadan işleýän senagatynyň halkara bazardaky ornuny has-da berkidýär.

Içerki bazarda bolsa ýerli telekeçiler milli önümçiligi goldamak maksady bilen möhüm çig mallary we azyk önümlerini satyn aldylar. Şeýlelikde, ýerli işewürler «Türkmennebit» döwlet konserninden «TPP D 30 S» kysymly ýokary hilli polipropileni satyn almak barada ylalaşyk gazandylar. Mundan başga-da, ýurdumyzyň azyk howpsuzlygyny we üpjünçiligini pugtalandyrmak çäklerinde «Türkmengallaönümleri» döwlet birleşiginden birinji hilli bugdaý ununy satyn almak boýunça geleşikler amala aşyryldy.