Ermenistanyň Türkmenistandaky ilçisi Arsen Awagýan «Turkmenportal» neşirine beren interwýusynda Ermenistanyň Türkmenistan bilen energetika ulgamyndaky hyzmatdaşlygy ösdürmek mümkinçiliklerine uly üns berýändigini we gaz pudagyndaky özara gatnaşyklary giňeltmäge gyzyklanma bildirýändigini mälim etdi.

Diplomatyň sözlerine görä, Ermenistan energetika howpsuzlygyny ýokarlandyrmak we energiýa üpjünçiliginiň çeşmelerini diwersifikasiýalaşdyrmak syýasatyny yzygiderli alyp barýar. Ol Türkmenistanyň dünýäde iň iri tebigy gaz ätiýaçlyklaryna eýe bolan ýurtlaryň biri hökmünde halkara energetika bazarynyň möhüm gatnaşyjysydygyny hem-de diňe bir Ermenistan üçin däl, eýsem, energetika howpsuzlygyny üpjün etmek we üpjünçilik ugurlaryny diwersifikasiýalaşdyrmak meselelerinde hem ähmiýetli hyzmatdaşdygyny belledi.

Awagýan energetika ugrunyň iki ýurduň arasyndaky hyzmatdaşlyk gün tertibinde adatça möhüm orun tutýandygyny nygtady. Bu ulgamdaky özara gatnaşyklaryň meseleleri Ykdysady hyzmatdaşlyk boýunça Hökümetara toparyň çäklerinde, şeýle hem Ermenistanyň we Türkmenistanyň degişli edaralarynyň arasyndaky duşuşyklaryň dowamynda yzygiderli seredilýär.

Ilçi energetika ulgamyndaky hyzmatdaşlygyň berk taryhy esasynyň bardygyny ýatlatdy: 1990-njy ýyllarda Türkmenistan Ermenistana tebigy gaz eltip berýän esasy ýurtlaryň biri bolupdy. Onuň sözlerine görä, toplanylan tejribe hyzmatdaşlygy has-da ösdürmek üçin gowy binýat döredýär, soňky ýyllarda bolsa energetika özara gatnaşyklarynyň dürli ugurlaryna bagyşlanan birnäçe maslahatlaşmalar we bilermenleriň derejesindäki çekişmeler geçirildi.

Şu bilen birlikde, Awagýan ýurtlaryň arasyndaky hyzmatdaşlygyň diňe bir gaz üpjünçiligi meseleleri bilen çäklenmeýändigini belledi. «Biz tejribe alyşmagy, döwrebap energetika tehnologiýalaryny ösdürmegi we özara bähbitli taslamalary amala aşyrmagy goşmak bilen, beýleki ugurlarda hem geljegi uly mümkinçilikleri görýäris» diýip, ilçi aýtdy.