Paýtagtymyz Aşgabat şäherinde şu ýylyň 21–23-nji oktýabrynda geçiriljek «Türkmenistanyň nebiti we gazy — 2026» (OGT 2026) atly XXXI Halkara maslahatyna we sergisine taýýarlyk işleri ýokary depginde alnyp barylýar. «Energiýa. Hyzmatdaşlyk. Ösüş.» diýen şygar astynda guralýan bu çäre sebitiň we dünýäniň energetika pudagynyň üns merkezinde durýar. Bu barada «Türkmenistan: Altyn asyr» elektron gazeti habar berdi.
Eýýäm otuz ýyldan gowrak wagtyň dowamynda «OGT» forumy halkara energetika gatnaşyklaryny ösdürýän iň abraýly meýdançalaryň biri hökmünde ykrar edildi. Nobatdaky duşuşyk hem däp bolşy ýaly dünýäniň dürli künjeklerinden ministrleri, iri döwlet we hususy energetika kompaniýalarynyň ýolbaşçylaryny, halkara maliýe institutlarynyň wekillerini, öňdebaryjy inženerleri we tehnologiýa bilen üpjün edijilerini bir ýere jemlär.
Meseleleriň giň gerimi ara alnyp maslahatlaşyljak «OGT 2026» çäresiniň maksatnamasy energetika howpsuzlygy, sanly özgertmeler, metanyň zyňyndylaryny azaltmak we durnukly ösüş ýaly dünýä energetikasynyň häzirki zaman gyzyklanmalaryna bagyşlanar. Şeýle hem maýa goýum hyzmatdaşlygy, gazhimiýa senagaty we täze tehnologik innowasiýalar maslahatda esasy ugurlaryň biri bolar.
Mundan başga-da, forumyň dowamynda ägirt uly «Galkynyş» gaz känini has-da ösdürmek, Hazar deňziniň türkmen bölegindäki geljegi uly taslamalar, şeýle hem ýurduň energetika infrastrukturasyny döwrebaplaşdyrmak bilen bagly maýa goýum mümkinçiliklerine aýratyn üns berler.
Bu gezekki forum Hazar sebitiniň we Merkezi Aziýa ýurtlarynyň arasynda sebitara gepleşikleri täze sepgide çykarmagy maksat edinýär. Milli we halkara hünärmenleriň hem-de dostlukly döwletleriň wekilleriniň işjeň gatnaşmagy strategik hyzmatdaşlygy giňeltmäge we amaly gatnaşyklaryň täze ugurlaryny kesgitlemäge mümkinçilik berer.
Häzirki wagta çenli dünýäniň 20-den gowrak ýurdundan 100-den gowrak halkara wekil çärä gatnaşjakdygyny tassyklady we bu ugurda hasaba almak işleri gyzgalaňly dowam edýär. Bu bolsa «OGT 2026» forumyna bolan halkara gyzyklanmanyň ýylsaýyn artýandygyny görkezýär.
Türkmenistan goňşy döwletler we daşary ýurtly hyzmatdaşlar bilen gatnaşyklaryny barha giňeldip, dünýä bazarynda ygtybarly hem-de jogapkärli energetika hyzmatdaşy hökmündäki ornuny berkidýär. Oktýabr aýynda Aşgabat şäheri ýene bir gezek dünýä energetika bileleşiginiň möhüm meseleleri çözýän esasy merkezine öwrüler.
