Hytaý Halk Respublikasynyň Türkmenistandaky Adatdan daşary we Doly ygtyýarly ilçisi Szi Şumin «SPT» («Sinopec Petroleum Technology Corporation») kompaniýasynyň Türkmenistandaky şahamçasyna resmi sapary amala aşyrdy. Kärhananyň önümçilik we hojalyk işleriniň ýagdaýy bilen ýakyndan tanyşmak maksady bilen geçirilen bu saparda ilçä Hytaýyň ilçihanasynyň söwda-ykdysady meseleler boýunça geňeşçisi Li Ýue ýoldaşlyk etdi. Diplomatik wekiliýet kompaniýanyň işgärleri bilen duşuşyp, olara mähirli goldawlaryny beýan etdiler. Bu barada ilçihananyň metbugat gullugy habar berdi.

Ilçi Szi Şumin «SPT» kompaniýasynyň Türkmenistandaky şahamçasynyň iki ýurduň arasyndaky energetika hyzmatdaşlygyna we amaly gatnaşyklary ösdürmäge goşýan uly goşandyna ýokary baha berdi. Ol Hytaýyň «Bir guşak, bir ýol» başlangyjynyň Türkmenistanyň «Beýik Ýüpek ýoluny gaýtadan dikeltmek» strategiýasynyň utgaşýan döwründe emele gelýän taryhy mümkinçiliklerden netijeli peýdalanmagyň möhümdigini nygtady.

Şeýle hem diplomat kärhana ýolbaşçylaryna we hünärmenlerine öz mümkinçiliklerini doly ulanmagy, önümçilikde ýurduň kanunçylygyny hem-de kadalaşdyryjy talaplaryny berk berjaý etmegi maslahat berdi. Ilçi amala aşyrylýan taslamalaryň hiline berk gözegçilik etmek, zähmet we önümçilik howpsuzlygy düzgünlerini gyşarnyksyz berjaý etmek hem-de hytaý-türkmen hemmetaraplaýyn strategik hyzmatdaşlyk gatnaşyklarynyň mundan beýläk-de çuňlaşdyrylmagyna täze goşant goşmak boýunça möhüm wezipeleri belledi.