Türkmenistanyň nebitgaz senagatynyň işgärleri hormatly Prezidentimiziň Ministrler Kabinetiniň giňişleýin mejlisinde ýurdumyzyň Garaşsyzlygynyň 35 ýyllyk baýramyny mynasyp garşylamak boýunça öňde goýan wezipelerini üstünlikli ýerine ýetirýärler. “Türkmennebit” döwlet konserniniň “Nebitgazburawlaýyş” trestiniň Goturdepe buraw işleri müdirliginiň burawlaýjylary birinji ýarym ýyllygyň jemleri boýunça bäş sany täze önümli guýyny ulanmaga berip, önümçilikde ýokary zähmet üstünliklerini gazandylar. Bu barada “Neýtralnyý Türkmenistan” gazetinde habar berilýär.

Goturdepäniň ýerasty baýlyklaryny özleşdirmek işleriniň 1970-nji ýyllaryň başyndan bäri alnyp barylýandygyna garamazdan, häzirki wagtda bu gadymy we baý kän giň möçberli döwrebaplaşdyryş tapgyryny başdan geçirýär. Önümçilik amallaryna öňdebaryjy enjamlar, döwrebap tehnologiýalar we “Nebitgazylmytaslama” institutynyň netijeli ylmy gözgütleri işjeň ornaşdyrylýar.

Kände nebit çykarylyşyny güýçlendirmek maksady bilen gaz ýüklemek usuly giňden ulanylýar. “Goturdepe” gaz gysyjy bekediniň bökdençsiz işiniň netijesinde, häzirki wagtda 500-den gowrak guýy tamamlanyjy usul arkaly netijeli peýdalanylýar. “Goturdepenebit” nebitgaz çykaryş müdirliginiň hünärmenleri we “Nebitgazdüýpliabatlaýyş” müdirliginiň toparlary guýylaryň önüm berijiligine yzygiderli gözegçilik edip, tehniki bökdençlikleriň öňüni öz wagtynda alýarlar.

Goturdepe käninde ýerasty baýlyklary rejeli peýdalanmak we tumşuklaryň hyzmat möhletini uzaltmak boýunça alnyp barylýan toplumlaýyn işler nebit çykarylyşynyň durnuklylygyny üpjün edýär. Bu bolsa Türkmenistanyň energetika garaşsyzlygyny pugtalandyrmaga hem-de ýurduň eksport kuwwatyny has-da artdyrmaga gönüden-göni goşant goşýar.