Ýagşygeldi Kakaýew adyndaky Halkara nebit we gaz uniwersitetinde Malaýziýanyň «PETRONAS» kompaniýasynyň, onuň «PETRONAS Carigali (Turkmenistan) Sdn Bhd» şahamçasynyň hem-de PETRONAS Tehnologiýa uniwersitetiniň wekilleri bilen iş maslahaty geçirildi. Gepleşikleriň esasy mowzugy hereket edýän özara düşünişmek hakyndaky Ähtnamanyň çäklerinde ylym-bilim hyzmatdaşlygyny berkitmekden we giňeltmekden ybarat boldy. Bu barada Türkmenistanyň Halkara habarlar merkezi habar berdi.

Duşuşygyň dowamynda ozal amala aşyrylan bilelikdäki taslamalaryň netijelerine uly baha berildi. Hususan-da, 90-a golaý türkmen talybynyň Malaýziýada tomusky önümçilik tejribeligini geçendigi, 14 mugallymyň Malaýziýanyň degişli ýokary okuw mekdebinde hünärini ýokarlandyrandygy hem-de 200 töweregi talybyň nebitgaz pudagynyň öňdebaryjy tehnologiýalary boýunça uzagara okuwlary üstünlikli tamamlandygy bellenildi.

Gepleşikleriň netijeleri boýunça taraplar hyzmatdaşlygyň täze ugurlaryny ösdürmek barada ylalaşdylar. Şunlukda, bilelikde ylmy-gözleg işlerini geçirmek we olaryň netijelerini halkara ylmy žurnallarda çap etmek meýilleşdirilýär.

Mundan başga-da, PETRONAS Tehnologiýa uniwersitetiniň professorlary tarapyndan nebitgaz işi, geologiýa, himiki tehnologiýalar we sanly ulgamlar boýunça dersleri dowam etdirmek hem-de talyplar we ýaş hünärmenler üçin amaly taýýarlyk maksatnamalaryny giňeltmek bellenildi.