Hormatly Prezidentimiz Serdar Berdimuhamedow 28-nji awgustda sanly ulgam arkaly geçirilen Ministrler Kabinetiniň mejlisinde Ministrler Kabinetiniň Başlygynyň orunbasary Guwanç Agajanowyň «Türkmennebit» döwlet konserniniň garamagyndaky nebiti gaýtadan işleýän zawodlaryň desgalarynyň bökdençsiz işlemegini üpjün etmek boýunça ýerine ýetirilýän işler baradaky hasabatyny diňledi. Bu barada Türkmenistanyň Döwlet habarlar agentligi habar berdi.

Mejlisde bellenilişi ýaly, «Türkmennebit» döwlet konserniniň garamagyndaky nebiti gaýtadan işleýän kärhanalaryň durnukly we bökdençsiz işlemegini üpjün etmek, önümçilik kuwwatlyklaryny netijeli peýdalanmak hem-de gaýtadan işleýän senagaty döwrebaplaşdyrmak boýunça yzygiderli işler alnyp barylýar.

Şunuň bilen birlikde, Türkmenbaşydaky nebiti gaýtadan işleýän zawodlar toplumynyň tehnologik desgalaryny elektrik energiýasy bilen ygtybarly üpjün etmek üçin zerur çäreleriň durmuşa geçirilýändigi aýdyldy. Bu ugurda degişli teklipler döwlet Baştutanymyzyň garamagyna hödürlenildi.

Hormatly Prezidentimiz ýurdumyzyň nebitgaz toplumyny ösdürmegiň milli ykdysadyýetiň möhüm ugurlarynyň biridigini belläp, önümçilik kuwwatlaryny artdyrmaga gönükdirilen işleri dowam etdirmegiň wajypdygyny nygtady. Döwlet Baştutanymyz Türkmenbaşydaky nebiti gaýtadan işleýän zawodlar toplumynda düýpli abatlaýyş işlerini geçirmek baradaky teklibi makullap, onuň talabalaýyk ýerine ýetirilmegi boýunça degişli tabşyryklary berdi.