Aşgabat 1–2-nji oktýabrda Türkmenistanyň Maýa goýum forumy 2026-nyň (TIF 2026) geçirilýän ýerine öwrüler. Halkara çärä 45 döwletden 800-den gowrak wekil, şol sanda iri maliýe düzümleriniň, döwlet edaralarynyň we işewür toparlaryň wekilleri gatnaşar.

Forumda ABŞ-nyň, Beýik Britaniýanyň, Germaniýanyň, Fransiýanyň, Ýaponiýanyň, Singapuryň, BAE-niň, Saud Arabystanynyň we Merkezi Aziýa ýurtlarynyň wekilleri Türkmenistanyň maýa goýum mümkinçiliklerini ara alyp maslahatlaşarlar.

TIF 2026-nyň esasy wakalarynyň biri Saud Arabystanynyň ýokary derejeli wekiliýetiniň sapary bolar. Oňa Najd Gate Holding maýa goýum holdinginiň başlygy Şazada Mansur bin Muhammed Al Saud ýolbaşçylyk eder. Wekiliýetiň düzüminde energetika, senagat, oba hojalygy, gozgalmaýan emläk we burawlaýyş ulgamlarynda işleýän kompaniýalaryň ýolbaşçylary bolar.

Saud maýadarlary Türkmenistanyň ykdysadyýetiniň dürli pudaklarynda hyzmatdaşlygyň täze mümkinçiliklerini öwrenmegi maksat edinýärler.

Forumyň ministrler derejesindäki gatnaşygyny Niderlandlar, Türkiýe, Pakistan, Ermenistan, Gyrgyzystan we Saud Arabystany tassykladylar. Şeýle hem Ýewropa Bileleşiginiň we Beýik Britaniýanyň diplomatik wekilhanalarynyň ýolbaşçylarynyň çykyş etmegine garaşylýar.

TIF 2026 Türkmenistanyň Maliýe we ykdysadyýet ministrligi, Daşary işler ministrligi hem-de «Türkmen Kongres» kompaniýasy tarapyndan guralýar. Çäräniň maksady Türkmenistanyň maýa goýum mümkinçiliklerini giňden tanyşdyrmak we halkara ykdysady hyzmatdaşlygy ösdürmekden ybaratdyr.