Aşgabat şäheri үstümizdäki ýylyň 21–23-nji oktýabry aralygynda geçiriljek XXXI-nji «Türkmenistanyň nebiti we gazy – OGT 2026» halkara maslahatyna we sergisine taýýarlyk görmegiň täze tapgyryna girdi. «Energetika. Hyzmatdaşlyk. Ösüş.» şygary astynda guralýan bu abraýly forum döwlet edaralarynyň wekillerini, milli we halkara nebitgaz kompaniýalarynyň ýolbaşçylaryny, maýadarlary, maliýe institutlaryny ham-da global tehnologiýa üpjün edijilerini bir ýere jemlär. Dünýäniň iň iri tebigy gaz gorlarynyň birine eýe bolan Türkmenistan üçin bu çäre gury ýer we deňiz ýataklaryny ösdürmek, energetika infrastrukturasyny döwrebaplaşdyrmak hem-de ýokary goşulan gymmatly önümleri öndürmek strategiýasyny halkara bileleşigine tanyşdyrmakda baş meýdança bolar.
Garaşsyz, Bitarap Türkmenistanyň global energetika binýadynda eýeleýän stratejik ornunyň esasy bölegi «Galkynyş» gaz käni bilen baglydyr. Dünýäniň iň iri gaz ýataklarynyň biri bolan bu kän milli ykdysadyýetiň eksport kuwwatyny berkitmekde we dünýä bazarlaryny durnukly «mawy ýangyç» bilen üpjün etmekde bökdençsiz çig mal çeşmesi hökmünde çykyş edýär. Şunda Türkmenistan — Hytaý transmilli gaz geçirijisiniň altynyň çeşmesi bolan bu ulgam diňe bir ykdysady taslama bolman, eýsem, XXI asyryň ägirt uly inženerçilik-tehniki desgalarynyň biri hökmünde Beýik Ýüpek ýoluny döwrebap binýatda gaýtadan dikeltmegiň aýdyň nusgasydyr.
«Galkynyş» gaz käniniň dördünji tapgyryny özleşdirmegiň çäklerinde ýylda 10 milliard kub metr harytlyk gazy taýýarlaýan desganyň gurluşygyna hem-de täze ulanyş guýularyny burawlamak işlerine resmi taýdan badalga berilmegi durnukly ösüşiň täze tapgyryny açdy. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň we Hytaýyň Döwlet Geňeşiniň Ýokary wekilleriniň gatnaşmagynda amala aşyrylan bu taryhy çäre iki döwletiň arasyndaky strategik hyzmatdaşlygyň durnuklylygyny görkezdi. Bu amallar eksport ugurlaryny diwersifikasiýalaşdyrmaga hem-de Hytaý ugry boýunça gaz akymyny yzygiderli artdyrmaga berk binýat döredýär.
Gaz käniniň giň möçberli özleşdirilmegi diňe bir nebitgaz pudagy bilen çäklenmän, eýsem, Mary welaýatynyň we tutuş ýurdumyzyň durmuş-ykdysady infrastrukturasynyň düýpli özgermegine getirdi. Önümçilik desgalarynyň töwereginde döwrebap ýaşaýyş toplumlary, ulag we suw üpjünçilik ulgamlary куrulyp, täze iş orunlary emele geldi. Şeýlelikde, ýokary derejeli inženerleriň, alymlaryň we hünärmenleriň utgaşykly zähmeti hem-de innowasion tehnologiýalaryň ornaşdyrylmagy netijesinde milli ykdysadyýetiň senagat kuwwaty yzygiderli ýokarlanýar.
Dünýäniň energetika jemgyýetçiligini bir ýere jemlejek «OGT 2026» halkara forumy bolsa ýurdumyzyň bu ugurdaky gazananlaryny jemlemäge, täze maýa goýumlary çekmäge we uzak möhletleýin hyzmatdaşlygy ilerletmäge uly itergi berer. Garaşsyzlygymyzyň şanly 35 ýyllygyna barýan ýolumyzda «Galkynyş» gaz käniniň täze tapgyrlarynyň işe girizilmegi Türkmenistanyň energetika garaşsyzlygyny onlarça ýyllar öňünden kepillendirýän hem-de geljek nesiller üçin abadan durmuşy üpjün edýän strategik binýat bolup hyzmat edýär.
Çynar Gurtmyradowa
“Türkmennebit” döwlet konserniniň Daşary ykdysady aragatnaşyklar müdirliginiñ Şertnama bölüminiñ baş hünärmeni
