15-nji martda Türkmenistanyň Pakistan Yslam Respublikasyndaky Ilçihanasy bilen Pakistanyň Parahatçylyk we diplomatik barlaglar instituty (IPDS) bilen bilelikde Türkmenistanyň Bitaraplygynyň 30 ýyllygyna bagyşlanan «Halkara parahatçylygy berkitmekde Bitaraplygyň orny» atly halkara maslahaty geçirdi.

Maslahata Pakistanyň Daşary işler ministrliginiň wekilleri, Pakistanda akkreditlenen diplomatik wekilhanalaryň, halkara guramalaryň we BMG-niň agentlikleriniň, YHG-nyň Ylmy gaznasynyň ýolbaşçylary we işgärleri, analitiki merkezleriň, Pakistanyň işewür toparlarynyň we ýerli köpçülikleýin habar beriş serişdeleriniň wekilleri gatnaşdylar.

Çäräniň çäklerinde Türkmenistanyň Pakistan Yslam Respublikasyndaky Ilçisi A.Möwlamow, Pakistanyň Parlament işleri boýunça federal ministri Tarik Fazal Çaudri, BMG-niň Pakistandaky Hemişelik utgaşdyryjysy Mohamed Ýahýa, Parahatçylyk we diplomatik barlaglar institutynyň prezidenti Farhaat Asif, Pakistanyň Türkmenistandaky ozalky Ilçisi Tarik Osman Haýder, Pakistanyň Milli goranmak uniwersitetiniň Halkara gatnaşyklary departamentiniň ýolbaşçysy Kurram Ykbal we Şahid Zulfikar Ali Bhutto adyndaky Ylym we tehnologiýalar institutynyň Durmuş ylymlary departamentiniň ýolbaşçysy Tarak Wahid çykyş etdiler.

Ilçi A.Möwlamow gutlag ýüzlenmesinde Türkmenistanyň Bitaraplygynyň 30 ýyllyk taryhy barada gürrüň berdi. Türkmenistanyň Bitaraplygynyň BMG-niň degişli Kararnamalary bilen dünýä bileleşigi tarapyndan ykrar edilendigi we bu Kararnamalarda Türkmenistanyň hemişelik Bitaraplyk hukuk ýagdaýynyň sebitde parahatçylygy we howpsuzlygy pugtalandyrmakda aýratyn orun eýeleýändiginiň berkidilendigi bellenildi. Ilçi ählumumy gün tertibiniň wajyp meselelerini çözmekde tagallalary birleşdirmäge gönükdirilen Türkmenistanyň Halkara parahatçylyk we ynanyşmak ýylynyň dowamyndaky işleriniň we ileri tutýan ugurlarynyň Konsepsiýasynyň ähmiýetine aýratyn ünsi çekdi.

Maslahatda çykyş edenler soňky 30 ýylda Türkmenistanyň Bitaraplygynyň ösüşiniň BMG-niň esasy gymmatlyklaryna we maksatlaryna laýyk gelýändigini subut edendigini we dünýä jemgyýetçiliginiň umumy baýlygy hökmünde ykrar edilendigini bellediler.

Maslahatyň dowamynda 30 ýyl mundan ozal, Merriot myhmanhanasynyň «Crystal Ball Room» zalynda, şol bir gün 1995-nji ýylyň 15-nji martynda Ykdysady hyzmatdaşlyk guramasynyň taryhy 3-nji Sammitiniň netijeleri boýunça Yslamabat Jarnamasynyň kabul edilmeginiň we halkara arenasynda ilkinji gezek Türkmenistanyň Bitaraplyk hukuk ýagdaýyna berk goldaw berilmeginiň we ykrar edilmeginiň aýratyn simwoliki häsiýete eýedigi bellenildi.

Çeşme: Türkmenistanyň Daşary işler ministrligi