15-16-njy apreli aralygynda Türkmenistanyň daşary işler ministriniň orunbasary A. Gurbanowyň ýolbaşçylygyndaky wekiliýet «Merkezi Aziýa – Aýlagdaky arap döwletleriniň hyzmatdaşlyk geňeşi» («MA — AADHG») strategik dialogynyň üçünji ministrler duşuşygyna gatnaşmak maksady bilen, Kuweýt döwletine iş saparyny amala aşyrdy. Duşuşyk El-Kuweýt şäherinde geçirildi.

Forumyň işine Merkezi Aziýa döwletleriniň we Aýlagdaky arap döwletleriniň hyzmatdaşlyk geňeşine girýän alty ýurduň – Saud Arabystany Patyşalygynyň, Birleşen Arap Emirlikleriniň, Katar Döwletiniň, Kuweýt Döwletiniň, Oman Soltanlygynyň we Bahreýn Patyşalygynyň daşary syýasat edaralarynyň ýolbaşçylary gatnaşdy.
Duşuşygyň dowamynda dürli ugurlar boýunça hyzmatdaşlygy ösdürmek, özara bähbitli gatnaşyklaryň gerimini giňeltmek meseleleri ara alnyp maslahatlaşyldy. Söwda-ykdysady, maýa goýum, ulag-aragatnaşyk, medeni-ynsanperwer, daşky gurşawy goramak we syýahatçylyk ugurlaryndaky hyzmatdaşlygy giňeltmäge gönükdirilen anyk teklipleri we maslahatlary taýýarlamagyň wajyplygyna aýratyn üns berildi.
Taraplar Merkezi Aziýa bilen Aýlagdaky arap döwletleriniň arasynda köpugurly hyzmatdaşlyk mehanizmlerini işjeň ösdürmek we özara gatnaşyklary pugtalandyrmak meýillerini tassykladylar.
Türkmenistanyň wekiliýeti çykyşynyň dowamynda strategik dialoga gatnaşyjy ýurtlaryň arasynda ulag-logistika, energetika, ykdysadyýet we ynsanperwer ugurlar boýunça hyzmatdaşlygy berkitmek boýunça möhüm meseleleri we başlangyçlary beýan etdi.
Şeýle-de saparyň çäginde Türkmenistanyň wekiliýeti Kuweýt Döwletiniň mirasdüşer şazadasy, Şeýh Sabah Al-Haled Al-Hamad Al-Mubarak Al-Sabahy bilen duşuşyk geçirdi.
Duşuşygyň dowamynda A.Gurbanow Kuweýt Döwletiniň ýolbaşçylaryna Türkmenistanyň Prezidenti Serdar Berdimuhamedowyň we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň mähirli salamlary we iň gowy arzuwlary ýetirdi.
Mirasdüşer şazada hoşniýetli sözler üçin minnetdarlyk bildirip, öz gezeginde, Türkmenistanyň Prezidentine we Halk Maslahatynyň Başlygyna mähirli salamyny ýetirdi.
«MA — AADHG» strategik dialogynyň üçünji ministrler duşuşygynyň çäklerinde A.Gurbanow Bahreýn Patyşalygynyň we Oman Soltanlygynyň wekiliýetleriniň ýolbaşçylary bilen duşuşyklary geçirdi.
Gepleşikleriň dowamynda hyzmatdaşlygyň häzirki ýagdaýy we geljegi, şeýle-de sebitleýin we halkara meseleler boýunça pikir alşyldy.
Şol bir wagtyň özünde Eýran, Oman, Katar, Türkmenistan we Özbegistan döwletleriniň Hökümetleriniň arasynda halkara ulag-üstaşyr geçelgesini döretmek baradaky Ylalaşygy (Aşgabat Ylalaşygyny) durmuşa geçirmegiň meseleleri hem ara alnyp maslahatlaşyldy.

Çeşme: Türkmenistanyň Daşary işler ministrligi