Türkmenistanyň Döwlet haryt-çig mal biržasynda 17-nji noýabrda geçirilen söwdalaryň dowamynda jemi 347 310 000,00 manat we 947 250,00 ABŞ dollary möçberinde 5 geleşik baglaşyldy. Daşarky bazarda Owganystanyň we Birleşen Arap Emirlikleriniň işewürleri türkmen önümlerini satyn almak boýunça geleşiklere gol çekdiler.
Daşary ýurtly hyzmatdaşlar bilen geçirilen söwda amallarynyň çäklerinde Owganystanyň işewürleri ýerli önüm öndürijilerden 1-nji hilli arassalanan (rafinirlenen) pagta ýagyny satyn almak barada geleşik baglaşdylar. Şeýle hem Birleşen Arap Emirlikleriniň wekilleri nah çig matany satyn almaga gyzyklanma bildirdiler.
Içerki bazarda bolsa ýerli telekeçiler Türkmenistanyň Saglygy goraýyş we derman senagaty ministrliginden buýan köküniň arassalanmadyk glisirrizin turşusyny, «Türkmennebit» döwlet konserninden bolsa «BND 60/90» kysymly şepbeşik nebit ýol bitumyny satyn almak boýunça şertnamalary resmileşdirdiler.
Geçirilen birža söwdalary türkmen önüm öndürijileriniň önümlerine bolan islegiň ýokarlanýandygyny, şeýle hem içerki we daşarky bazarlarda söwda gatnaşyklarynyň yzygiderli ösdürilýändigini görkezýär. Türkmenistanyň Döwlet haryt-çig mal biržasy ykdysady gatnaşyklaryň giňeldilmegine, milli önümleriň dünýä bazarlaryna çykarylmagyna we işewür hyzmatdaşlygyň pugtalandyrylmagyna möhüm goşant goşýar.