Şu gün Aşgabatda Birleşen Milletler Guramasynyň Merkezi Aziýa ýurtlarynyň ykdysadyýetleri üçin Ýörite maksatnamasynyň (SPECA) hepdeliginiň çäklerinde geçirilýän ykdysady forum öz işine başlaýar. Şu mynasybetli Türkmenistanyň Prezidenti Serdar Berdimuhamedow bu halkara çärä gatnaşyjylara Gutlag iberdi.
"Bitarap Türkmenistanyň mukaddes Garaşsyzlygynyň şanly 35 ýyllyk baýramynyň belleniljek ýylynda geçirilýän ykdysady forum Türkmenistanyň SPECA agza beýleki döwletler bilen bilelikde sebitde mundan beýläk-de ösüşi üpjün etmäge gönükdirilen maksatlara ýetmek ugrunda yzygiderli tagallalarynyň üstünlikli durmuşa geçirilmegine ýardam eder" diýip, döwlet Baştutanymyz Gutlagynda nygtaýar.
Gutlagda bellenilişi ýaly, agza döwletler SPECA-nyň iş gerimini giňeltmegi, ýagny onuň çägine elektron söwda, sanlylaşdyrma, «ýaşyl» ösüş, Hazar sebitinde we onuň çäklerinden daşarda energetika özara baglanyşygy hem-de Ýewraziýa sebitinde ulag baglanyşygy boýunça taslamalary girizmegi goldaýarlar. Türkmenistan SPECA-nyň 2025-nji ýyldaky başlygy hökmünde harytlaryň, hyzmatlaryň, maýa goýumlaryň we innowasiýalaryň netijeli sebit bazaryny döretmäge gönükdirilen teklipleri öňe sürdi.
Türkmenistanyň halkara işjeňliginiň ileri tutulýan ugurlarynyň biri Birleşen Milletler Guramasynyň Baş Assambleýasy tarapyndan energiýa durnuklylygy boýunça üç sany Kararnamanyň kabul edilmegi boldy. Türkmenistan SPECA-nyň suw we energetika serişdeleri hem-de daşky gurşaw boýunça iş toparynyň işini energetika babatda birnäçe ugurlara gönükdirmegi teklip edýär.
"Biziň ýurdumyzyň başlangyjy bilen soňky 10 ýylyň dowamynda Birleşen Milletler Guramasynyň Baş Assambleýasy tarapyndan durnukly ulag ulgamy boýunça alty sany Kararnama kabul edildi. Bu Kararnamalar ulag ulgamynda milli Hökümetleriň, şeýle hem ählumumy we sebit guramalarynyň işiniň netijeliligini ýokarlandyrmaga gönükdirilen täze halkara hukuk gurallaryny işläp taýýarlamak üçin binýady döretdi. Dünýä ykdysadyýetiniň özgerýän şertlerinde durnukly ulag ulgamlaryny ösdürmegiň, logistika özara baglanyşygyny pugtalandyrmagyň, ygtybarly ulag-aragatnaşyk üpjünçilik ulgamlaryny guramagyň ähmiýetini nazara almak bilen, uzak möhletli geljege gönükdirilen bilelikdäki anyk ädimleri kesgitlemek we olary yzygiderli durmuşa geçirmek aýratyn möhüm bolup durýar" diýip, hormatly Prezidentimiz Gutlagynda aýdýar.
Foruma gatnaşýan myhmanlar häzirki döwürde Türkmenistanyň ösüşiniň umumy ykdysady görkezijileri, maýa goýum strategiýasy, senagat-innowasion ösüşi, önümçilik ulgamyna ylmy-tehniki işläp taýýarlamalaryň we iň täze tehnologiýalaryň ornaşdyrylmagy hem-de ýurdumyzyň ykdysady kuwwaty, Garaşsyzlyk ýyllarynda gazanan üstünlikleri bilen ýakyndan tanşarlar.
Döwlet Baştutanymyz Gutlagynyň ahyrynda: "Ykdysady forum Türkmenistanyň Birleşen Milletler Guramasynyň Merkezi Aziýa ýurtlarynyň ykdysadyýetleri üçin Ýörite maksatnamasyna agza döwletleriň bu düzümi parahatçylyk, ynanyşmak we hyzmatdaşlyk üçin giň meýdança öwürmek ugrunda alyp barýan tagallalaryna işjeň goşulýandygyny subut eder. Netijeli häsiýete eýe boljak bu forum dialogy ilerletmek, tagallalary birleşdirmek, strategiýalary işläp taýýarlamak we olaryň ýerine ýetirilmegi üçin iş meýilnamalaryny düzmek üçin giň mümkinçilik döredýär. Şeýle hem forum SPECA tarapyndan kabul edilen strategik resminamalaryň ýerine ýetirilişini gözden geçirmek, olary has giň gerimde durmuşa geçirmek, aýratyn-da, 2030-njy ýyla çenli SPECA-nyň Ösüş konsepsiýasyny ara alyp maslahatlaşmak ýaly Türkmenistanyň umumy maksatlaryna laýyk gelýär" diýip belleýär.
