Aşgabatda 3-nji noýabrda Birleşen Milletler Guramasynyň «Durnukly, innowasion we ekologiki taýdan abadan şäherleri kemala getirmek: geljek üçin hyzmatdaşlyk» atly ýokary derejedäki halkara tegelek stoly geçirildi. Ol «Türkmenistanyň gurluşygy, senagaty we energetikasy – 2026» (CIET 2026) halkara maslahatynyň we sergisiniň çäklerinde geçdi. Tegelek stolda Aşgabat şäheriniň häkimi Rahym Gandymow çykyş etdi.
R.Gandymowyň sözlerine görä, duşuşyk tejribe alyşmaga, halkara hyzmatdaşlygy pugtalandyrmaga we şäherleriň durnukly ösüşiniň geljegini ara alyp maslahatlaşmaga mümkinçilik berýär. Häkim paýtagtyň ösüşine, şäher infrastrukturasynyň döwrebaplaşdyrylmagyna, öňdebaryjy tehnologiýalaryň ornaşdyrylmagyna we ilatyň ýaşaýşy üçin amatly şertleriň döredilmegine berýän ünsi üçin hormatly Prezidentimiz Serdar Berdimuhamedowa we türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Gurbanguly Berdimuhamedowa minnetdarlyk bildirdi. Ol şäherleriň durnukly ösüşi, ekologiki abadançylyk we raýatlaryň ýaşaýyş hilini ýokarlandyrmak meseleleriniň sosial-ykdysady ösüşiň milli maksatnamalarynda möhüm orun tutýandygyny belledi.
«Häzirki zaman şäheri diňe bir binalar, ýollar we inženerçilik desgalary däl» diýip, häkim beýan etdi we onuň, ilkinji nobatda, ýaşamak, döredijilikli zähmet çekmek, bilim almak we adamyň kemala gelmegi üçin giňişlikdigini goşmaça belledi. Ol dünýäniň ähli ýerindäki şäherleriň umumy wehimlere, ýagny howanyň üýtgemegine, energiýa we suw serişdelerine bolan islegiň artmagyna, infrastrukturany döwrebaplaşdyrmak we ekologiki howpsuzlygy üpjün etmek zerurlygyna duş gelýändigini aýtdy.
R.Gandymowyň sözlerine görä, Aşgabat üçin tebigy baýlyklardan rejeli peýdalanmak, energiýa netijeliligini ýokarlandyrmak we şäher infrastrukturasyny üýtgeýän howa şertlerine uýgunlaşdyrmak aýratyn ähmiýete eýedir. Onuň nygtaýşy ýaly, gurak howaly sebit üçin suwdan netijeli peýdalanmak, ýerleri ýaşyllaşdyrmak, energiýa tygşytlaýjy tehnologiýalary we gurluşykda ekologiki taýdan jogapkärli çemeleşmeleri ornaşdyrmak ileri tutulýan ugurlara öwrülýär. Häkim şeýle hem sanly özgertmeleriň şäher dolandyryşy üçin täze mümkinçilikleri açýandygyna ünsi çekdi: akylly ulag ulgamlary, sanly şäher hyzmatlary we inženerçilik torlaryna gözegçilik etmegiň tehnologiýalary serişdelerden peýdalanmagyň netijeliligini we ilata hyzmat etmegiň hilini ýokarlandyrmaga mümkinçilik berýär.
Çykyş eden häkim tegelek stolyň mowzugyny Birleşen Milletler Guramasynyň Durnukly ösüş babatda 2030-njy ýyla çenli döwür üçin Gün tertibi bilen, hususan-da, şäherleriň we ilatly ýerleriň açyklygyny, howpsuzlygyny, çydamlylygyny we ekologiki durnuklylygyny üpjün etmegi göz öňünde tutýan Durnukly ösüş maksatlarynyň 11-njisi bilen baglanyşdyrdy. Ol Türkmenistanyň BMG we onuň ýöriteleşdirilen edaralary bilen hyzmatdaşlyga uly ähmiýet berýändigini belläp, BMG-Habitat we BMG-niň Ösüş maksatnamasy bilen hyzmatdaşlygy ýokary bahalandyrdy. Şu ýylyň maý aýynda «Ak şäher Aşgabat – 2026» halkara forumynyň çäklerinde BMG-niň wekilleriniň gatnaşmagynda häzirki zaman şäherleriniň durnukly ösüşine bagyşlanan ýokary derejedäki tegelek stol geçirildi; häzirki tegelek stol bu gepleşikleri dowam etdirýär.
Häkim halkara hyzmatdaşlygyň geljegi uly ugurlary hökmünde energiýa netijeli gurluşygy, durnukly infrastrukturany, şäher hojalygynyň sanlylaşdyrylmagyny, suwdan rejeli peýdalanmagy we ekologiki taýdan howpsuz ulagy görkezdi. Onuň sözlerine görä, şäherleriň durnukly ösüşini diňe milli tagallalar bilen üpjün etmek mümkin däl: munuň üçin giň hyzmatdaşlyk, özara ynanyşmak we yzygiderli tejribe alyşmak zerurdyr. R.Gandymow Aşgabadyň Birleşen Milletler Guramasy, halkara ösüş institutlary we dünýäniň dürli ýurtlarynyň şäherleri bilen hyzmatdaşlygy mundan beýläk-de giňeltmäge açykdygyny beýan etdi.
