Almaty şäherinde 28-nji noýabrda Gazagystanyň Daşary işler ministrligi tarapyndan BMG-niň Merkezi Aziýa üçin öňüni alyş diplomatiýasy boýunça Sebitleýin merkeziniň (UNRCCA) goldaw bermeginde Merkezi Aziýa ýurtlarynyň Daşary işler ministrleriniň orunbasarlarynyň 15-nji duşuşygy geçirildi.

Duşuşyga Merkezi Aziýa ýurtlarynyň we BMG-niň Owganystana ýardam bermek boýunça missiýasynyň, BMG-niň syýasy meseleler bölüminiň, şeýle hem UNRCCA-nyň wekilleri gatnaşdylar. Türkmen tarapyna Türkmenistanyň Gazagystandaky Ilçisi Batyr Rejepow wekilçilik etdi.

Türkmen wekili öz çykyşynda Türkmenistanyň halkara başlangyçlaryna işjeň gatnaşýandygyny belläp, ýurduň hereketleriniň hemişelik bitaraplyk ýörelgelerine esaslanýandygyny nygtady.

Gepleşikleriň dowamynda taraplar sebit we halkara gün tertibiniň möhüm meselelerini, şeýle hem sebitleýin hyzmatdaşlygy ösdürmegiň mümkinçiliklerini ara alyp maslahatlaşdylar. Hususan-da, söwda-ykdysadyýet, ulag-logistika, suw-energetika we howanyň üýtgemegi bilen bagly meseleler boýunça pikir alşyldy.

Gatnaşyjylar sebitde parahatçylyga we howpsuzlyga täsir edýän wakalary we ýüze çykýan täze howplara garşy bilelikdäki çäreleri utgaşdyrmagyň zerurlygyny nygtadylar.